తెలంగాణ ప్రభుత్వం నూతనంగా ప్రవేశపెట్టిన ‘గద్దర్ అవార్డ్స్-2025’లో భాగంగా.. భారతీయ చలనచిత్ర రంగానికి చేసిన విశేష కృషికి గాను మెగాస్టార్ చిరంజీవికి ప్రతిష్టాత్మక ‘ఎన్టీఆర్ జాతీయ చలనచిత్ర పురస్కారం’ దక్కింది. తనదైన నటన, డ్యాన్స్, మాస్ అప్పీల్తో తెలుగు వాణిజ్య సినిమాను కొత్త పుంతలు తొక్కించిన ఆయన.. ఎన్టీఆర్ పేరుతో ఉన్న ఈ జాతీయ స్థాయి అవార్డుకు ఎంపికవడం విశేషం.
చిరంజీవి కెరీర్లో ఇది మరో అద్భుతమైన ఘట్టం. గతేడాది (2024) ఆయన భారత ప్రభుత్వ అత్యున్నత పురస్కారం ‘పద్మవిభూషణ్’తో పాటు, గిన్నిస్ వరల్డ్ రికార్డ్స్లోనూ చోటు సంపాదించుకున్న విషయం తెలిసిందే. ఎన్నో ఆటుపోట్లను ఎదుర్కొని అత్యున్నత స్థాయికి ఎదిగిన ఆయన ప్రయాణం ఎంతోమంది వర్ధమాన నటులకు స్ఫూర్తిదాయకం.
ఇక సినిమాల విషయానికొస్తే.. ఇటీవల ‘మన శంకర వరప్రసాద్ గారు’ చిత్రంతో ఇండస్ట్రీ హిట్ను అందుకున్న మెగాస్టార్, ప్రస్తుతం దర్శకుడు బాబీతో ఓ సినిమా చేస్తున్నారు. అలాగే ఆయన నటిస్తున్న భారీ ఫాంటసీ చిత్రం ‘విశ్వంభర’ కోసం ప్రేక్షకులు ఎంతో ఆసక్తిగా ఎదురుచూస్తున్నారు.
