తమిళ స్టార్ హీరో విజయ్ తలపతి హీరోగా వచ్చిన మాస్టర్ సినిమా సంక్రాంతి కానుకగా జనవరి 13న థియేటర్లలో విడుదలైన విషయం తెలిసిందే. ప్రపంచవ్యాప్తంగా ఈ సినిమా భారీ కలెక్షన్లను సాధిస్తోంది. ఇప్పటివరకు ప్రపంచవ్యాప్తంగా రూ.150 కోట్లకు పైగా కలెక్షన్లు వసూలు చేసినట్లు ట్రేడ్ వర్గాలు అంచనా వేశాయి. ఒక్క తమిళనాడులోనే రూ.100 కోట్లకు పైగా కలెక్షన్లు వసూలు చేసినట్లు ఫిల్మ్ వర్గాలు చెబుతున్నాయి.
అయితే ఈ సినిమాను త్వరలో ఓటీటీలో రిలీజ్ చేసేందుకు సన్నాహాలు జరుగుతున్నాయి. ప్రముఖ ఓటీటీ ఫ్లాట్‌ఫామ్ అమెజాన్ ప్రైమ్ ఈ సినిమా డిజిటల్ రైట్స్‌ను కొనుగోలు చేసినట్లు తెలుస్తోంది. భారీ ధర చెల్లించి అన్ని భాషల డిజిటల్ రైట్స్‌ను అమెజాన్ ప్రైమ్ కొనుగోలు చేసినట్లు సమాచారం. దీంతో ఫిబ్రవరి 12 నుంచి స్ట్రీమింగ్ చేయనున్నట్లు అమెజాన్ ప్రైమ్ తాజాగా ప్రకటించింది.
