టాలీవుడ్ ఇండస్ట్రీలో మరొక విషాద ఘటన చోటు చేసుకుంది. ప్రముఖ సినీ, టీవీ నటుడు కోసూరి వేణుగోపాల్ బుధవారం రాత్రి కన్నుమూశారు. గత కొన్ని రోజులుగా ల్ కరోనా వైరస్ తో బాధపడుతున్న ఆయన గచ్చిబౌలిలోని ఓ ప్రైవేట్‌ ఆస్పత్రిలో చికిత్స తీసుకుంటుండగా ప్రాణాలు కోల్పోయారు. దాదాపు 20రోజులకుపైగా ఈ నటుడు వెంటిలేటర్ పైనే ఉన్నట్లు వైద్యులు తెలిపారు. ఇటీవల నిర్వహించిన కరోనా వైరస్ పరీక్షల్లో నెగెటివ్‌ వచ్చినప్పటికీ ఆయన కొలుకోలేదు.
కేవలం సీరియల్స్ లోనే కాకుండా వెండితెరపై కూడా ఆయన తన నటనతో ఎంతగానో ఆకట్టుకున్నారు. గోదావరి జిల్లా నరసాపురానికి చెందిన వేణుగోపాల్ ఎఫ్‌సీఐలో మేనేజర్‌గా పని చేశారు. ఈ మధ్యనే పదవీ విరమణ చేశారు. ఒకవైపు ఉద్యోగంలో కొనసాగుతూనే మరోవైపు యాక్టర్ గా కూడా తనకంటూ ఒక ప్రత్యేకమైన గుర్తింపు తెచ్చుకున్నారు. ఆయాన ఎక్కువగా రాజమౌళి సినిమాల్లో నటించారు. మర్యాద రామన్నలో వేణుగోపాల్ చేసిన కామెడీ రోల్ కూడా బాగా క్లిక్కయ్యింది. ఇక ఛత్రపతి, పిల్లజమిందారు, భలే భలే మగాడివోయ్, ఛలో వంటి సినిమాల్లో కూడా ఆయన మంచి పాత్రలు పోషించారు. ఆయనకు భార్య, కుమారుడు, కుమార్తె ఉన్నారు. వేణుగోపాల్ మృతిపట్ల టాలీవుడ్ సినీ ప్రముఖులు సంతాపం ప్రకటించారు.
