‘గేమ్ చేంజర్’ ట్రైలర్‌లో ప్రతీ షాట్ అద్భుతంగా అనిపించింది.. ట్రైలర్ లాంచ్ ఈవెంట్లో దర్శకధీరుడు రాజమౌళి
ఇటు మెగాభిమానులు, అటు సినీ ప్రేక్ష‌కులు ఎంతో ఎగ్జ‌యిట్‌మెంట్‌తో ఎదురు చూస్తోన్న స‌మ‌యం రానే వ‌చ్చేసింది. గ్లోబల్ స్టార్ రామ్ చరణ్ టైటిల్ పాత్రలో నటించిన భారీ బడ్జెట్ పాన్ ఇండియా మూవీ ‘గేమ్ చేంజర్’ ట్రైలర్ ప్రేక్ష‌కుల ముందుకు వ‌చ్చేసింది. మాస్ ఎలిమెంట్స్‌తో పాటు శంకర్ మార్క్ మెసేజ్ ఓరియెంటెడ్ చిత్రంగా లార్జ‌ర్ దేన్ లైఫ్ మూవీగా గేమ్ చేంజ‌ర్‌ను ఆవిష్క‌రించిన‌ట్లు సుస్ప‌ష్టంగా ట్రైలర్ను చూస్తే అర్థ‌మ‌వుతోంది. దర్శకధీరుడు ఎస్.ఎస్.రాజమౌళి చేతుల మీదుగా ‘గేమ్ చేంజర్’ ట్రైలర్ విడుద‌ల కావ‌టం విశేషం.
గ్లోబల్ స్టార్ రామ్ చరణ్ క‌థానాయ‌కుడిగా స్టార్ డైరెక్టర్ శంకర్ ద‌ర్శ‌క‌త్వంలో రూపొందిన భారీ బడ్జెట్ చిత్రం ‘గేమ్ చేంజర్’. ఈ చిత్రంలో రామ్ చరణ్ సరసన కియారా అద్వానీ హీరోయిన్‌గా నటించారు. ఈ సినిమాను శ్రీమ‌తి అనిత స‌మ‌ర్ప‌ణ‌లో శ్రీవెంకటేశ్వర క్రియేషన్స్, జీ స్టూడియోస్, దిల్ రాజు ప్రొడక్షన్ బ్యానర్స్‌పై దిల్ రాజు, శిరీష్ ఈ పాన్ ఇండియా మూవీని నిర్మించారు. సంక్రాంతి సంద‌ర్భంగా జనవరి 10న ఈ చిత్రం తెలుగు, తమిళ, హిందీ భాష‌ల్లో గేమ్ చేంజర్ విడుద‌ల‌వుతోంది. ఇప్ప‌టికే విడుద‌లైన సాంగ్స్, టీజ‌ర్‌, ప్ర‌మోష‌న‌ల్ కంటెంట్‌తో సినిమాపై అంచ‌నాలు ఆకాశాన్నంటాయి. ఈ అంచ‌నాల‌ను మరింత పెంచేలా తాజాగా ‘గేమ్ చేంజర్’ ట్రైలర్ను విడుద‌ల చేశారు.
ఇక ట్రైలర్ విష‌యానికి వస్తే..
‘వంద ముద్దలు తినే ఏనుగు… ఒక్క ముద్ద వదిలిపెడితే దానికి వచ్చే నష్టం ఏమీ లేదు. కానీ, ఆ ఒక్క ముద్దా లక్ష చీమలకు ఆహారం. నేను అడిగేది ఆ ఒక్క ముద్దే’ అని గ్లోబల్ స్టార్ రామ్ చరణ్ చెప్పే డైలాగ్‌తో ‘గేమ్ చేంజర్’ ట్రైలర్ మొదలైంది. కలెక్టర్ కి ఆకలి వేస్తుందని రౌడీ గ్యాంగులో ఒకరు అనడం, ఆ తర్వాత డైలాగ్స్ అండ్ సీన్స్ అదిరిపోయాయి. ‘రాకి రా… సార్‌కి సార్’ అని హీరో చెప్పే డైలాగ్ హైలైట్‌గా నిలిచింది. హెలికాప్టర్ లోనుంచి లుంగీ కట్టుకుని చరణ్ దిగే సీన్ అభిమానులకు విజువల్ ఫీస్ట్ అని చెప్పాలి. అలాగే మా పార్టీ సేవ చేయడానికే కానీ సంపాదించడానికి కాదు అనే చెప్పే డైలాగ్ సద‌రు స‌న్నివేశాలు సినిమా పొలిటికల్ థ్రిల్ల‌ర్‌గా ఎంగేజింగ్‌గా అన్నీ వ‌ర్గాల ప్రేక్ష‌కులను మెప్పించేలా గేమ్ చేంజర్ సంక్రాంతికి సంద‌డి చేయ‌బోతున్నార‌ని తెలుస్తోంది. ఈ నేప‌థ్యంలో…
దర్శకధీరుడు ఎస్.ఎస్.రాజమౌళి మాట్లాడుతూ..‘శంకర్ గారు ఫస్ట్ తెలుగు సినిమా అని అంతా చెబుతుంటే.. అవునా? నిజమా? అని అనిపించింది. కానీ తెలుగు వాళ్లకి శంకర్ గారు తమిళ దర్శకుడు కాదు.. మన తెలుగు దర్శకుడే. శంకర్ గారు అంటే తెలుగు వారందరికీ గౌరవం. ఆ గౌరవంతోనే దిల్ రాజు గారు ఈ మూవీని శంకర్ గారితో తీసి ఉంటారు. ప్రస్తుతం ఉన్న కుర్ర దర్శకులు మమ్మల్ని చూసి గర్వపడుతుంటారు. కానీ మేం మాత్రం శంకర్ గారిని చూసి గర్వపడుతుంటాం. ఆయనే డైరెక్టర్లకు ఓజీ.. ఒరిజినల్ గ్యాంగ్ స్టర్. మనకున్న పెద్ద కలల్ని సినిమాగా తీస్తే.. డబ్బులు వెనక్కి వస్తాయని అందరికీ కాన్ఫిడెంట్ ఇచ్చిన డైరెక్టర్ శంకర్. ట్రైలర్ను రిలీజ్ చేసే ఛాన్స్ ఇచ్చినందుకు థాంక్స్. ఈ మూవీతో వింటేజ్ శంకర్ గారెని చూస్తాం. ఒకే ఒక్కడు నాకు చాలా ఇష్టమైన సినిమా. ఆ స్థాయిని మించేలా గేమ్ చేంజర్ ఉంటుందనిపిస్తుంది. ట్రైలర్ చూస్తే.. ప్రతీ షాట్, సీన్ ఎగ్జైట్మెంట్‌ను ఇచ్చింది. మగధీర నుంచి ఆర్ఆర్ఆర్‌కే రామ్ చరణ్ ఎంతో ఎదిగి పోయాడు. మగధీర టైంలో రామ్ చరణ్‌ను హీరో అని పిలుస్తూ ఉండేవాడ్ని. హెలికాప్టర్ నుంచి లుంగీ కట్టుకుని కత్తి పట్టుకుని దిగుతుంటే.. విజిల్స్ ఎలా వస్తాయో నాకు తెలుస్తోంది. జనవరి 10న థియేటర్లోకి గేమ్ చేంజర్ రాబోతోంది. అందరూ థియేటర్లో చూడండి’ అని అన్నారు.
స్టార్ డైరెక్టర్ శంకర్ మాట్లాడుతూ.. ‘గేమ్ చేంజర్ చిత్రంలో అన్ని రకాల అంశాలు ఉంటాయి. సోషల్ కమర్షియల్, మాస్, ఎంటర్టైనర్‌గా ఉంటుంది. ఓ పొలిటికల్ లీడర్, ఓ ఐఏఎస్ ఆఫీసర్ మధ్య జరిగే కథ. హీరో పాత్రకు ఓ ఫ్లాష్ బ్యాక్ ఉంటుంది. రామ్ చరణ్ గారు అద్భుతంగా నటించారు. అందరూ శంకరాత్రి అని అంటున్నారు. కానీ ఇది రామ నవమి. రామ్ చరణ్ తన పాత్రల్లో ఒదిగిపోయారు. అక్కడ రామ్ చరణ్ కాకుండా మీకు ఆ పాత్రలే కనిపిస్తాయి. అంత అద్భుతంగా కనిపిస్తారు. సాంగ్స్, యాక్షన్స్, పర్ఫామెన్స్ ఇలా అన్నింట్లో అద్భుతంగా నటించారు. ఆయన స్క్రీన్ ప్రజెన్స్ గురించి ఎంత చెప్పినా తక్కువే అవుతుంది. రామ్ చరణ్‌ను చూసేందుకే జనాలు వచ్చేస్తారు. ఈ సినిమాతో మరోసారి రామ్ చరణ్ అందరి హృదయాల్ని గెలిచేస్తారు. కియారా అద్వాణీ గారు రామ్ చరణ్ గారితో పాటు అద్భుతంగా డ్యాన్స్ చేశారు. అంజలి గారు తన నటనతో పాత్రకు జీవం పోశారు. ఎస్ జే సూర్య లాంటి యాక్టర్స్‌ని చాలా అరుదుగా చూస్తుంటాం. ఒక్కో సీన్, ఒక్కో షాట్‌ను ఎంతో పర్ఫెక్ట్‌గా చేస్తారు. శ్రీకాంత్ గారు ప్రోస్థటిక్ మేకప్‌తో చాలా చక్కగా నటించారు. చూస్తే నార్మల్‌గా ఉంటారు. కెమెరాముందుకు వస్తే మాత్రం సింహాంలా నటించేస్తారు. సముద్రఖని గారు ఎంతో సహజంగా నటిస్తారు. సునీల్ గారికి చాలా కొత్త పాత్రను చేశారు. రాజీవ్ కనకాల గారు తన అనుభవాన్ని చూపించారు. ఆర్టిస్టులంతా కలిసి తమ నటనతో ఈ సినిమాను నిలబెట్టారు. నేను ఏం అడిగినా, ఏం చెప్పినా కూడా దిల్ రాజు ఇచ్చారు. నన్ను తెలుగుకి పరిచయం చేసినందుకు దిల్ రాజు గారికి థాంక్స్. ప్రతీ రోజూ సెట్స్‌కు వచ్చి అన్నీ గమనిస్తుంటారు. శిరీష్ గారు దిల్ రాజుకు ఎంతో సపోర్ట్‌గా ఉంటారు. రెహమాన్ లేడనే లేటు నాకు తెలీకుండా తమన్ నా నమ్మకాన్ని నిలబెట్టి సంగీతం ఇచ్చారు. ఆర్ఆర్ అద్భుతంగా ఇచ్చారు. డీఓపీ తిరు గారు ఒక్కో విజువల్‌ను ఐ క్యాచీగా ఇచ్చారు. ఫస్ట్ టైం ఇన్ ఫ్రా రెడ్ టెక్నాలజీ వాడాం. పాటలకు చాలా వరకు కొత్త టెక్నాలజీ వాడాం. జరగండి సెట్‌ను ప్రొడక్షన్ డిజైనర్‌ అవినాష్ కొల్ల అద్భుతంగా వేశారు. రామకృష్ణ వేసిన డోప్ సాంగ్ సెట్ బాగా వచ్చింది. ఎడిటర్ రూబెన్ ఈ సినిమాను రేసీగా కట్ చేశారు. ప్రస్తుతం ఉన్న జనరేషన్ ఓ ఐదు నిమిషాలు గ్యాప్ దొరికినా ఫోన్ చూసేస్తుంటారు. కానీ అలా పక్కకి తిప్పుకోనివ్వకుండా అద్భుతంగా కట్ చేశారు. వీఎఫ్ఎక్స్ వర్క్ కూడా అద్భుతంగా వచ్చింది. కార్తిక్ సుబ్బరాజ్ వద్ద కథను తీసుకుని ఈ మూవీని చేశాను. ఇది కూడా నాకు ఓ గేమ్ చేంజర్ లాంటిదే. సాయి మాధవ్ బుర్రా గారు అద్భుతమైన డైలాగ్స్ రాసిచ్చారు. పక్కా తెలుగు ఫ్లేవర్ ఉండేలా రాసిచ్చారు. ప్రభుదేవా గారు జరగండి సాంగ్‌ను ఫ్రీగా చేశారు. రామ్ చరణ్ గారి మీద ప్రేమతో, దిల్ రాజు గారు ప్రేమతో ఆయన ఉచితంగా చేశారు. రా మచ్చా పాటను గణేష్ ఆచార్య గారు చేశారు. ప్రతీ కొరియోగ్రాఫర్ రామ్ చరణ్ గారి మీద చాలా పెద్ద షాట్స్, స్టెప్స్ వేయించారు. ప్రేమ్ రక్షిత్ గారు సోలో ఫుల్ సాంగ్ చేశారు. జానీ మాస్టర్ గారు డూప్ సాంగ్ చేశారు. నేను ఏదో కొత్తగా ఆలోచిస్తే నాకంటే కొత్తగా ఆలోచించి కొరియోగ్రఫీ చేశారు. హైరానా పాటను బాస్కో మాస్టర్ చాలా బాగా కొరియోగ్రఫీ చేశారు. శాండీ గారు బిట్ సాంగ్ చేశారు. అన్బరివ్ యాక్షన్స్ అద్భుతంగా వచ్చాయి. రామజోగయ్య శాస్త్రి గారు, అనంత శ్రీరామ్ గారు, కాసర్ల శ్యాం గారు ఓ ఫోక్ సాంగ్ రాసిచ్చారు. హాలీవుడ్‌లా మనం తీయాలని అనుకుంటాం. కానీ హాలీవుడ్ కూడా ఇప్పుడు మనలా సినిమాలు తీయాలని అనుకుంటున్నారు. దానికి కారణం రాజమౌళి గారు. జనవరి 10న గేమ్ చేంజర్ రాబోతోంది’ అని అన్నారు.
గ్లోబ‌ల్‌స్టార్ రామ్ చరణ్ మాట్లాడుతూ.. ‘గేమ్ చేంజర్ ట్రైలర్ను రిలీజ్ చేసిన రాజమౌళి గారికి థాంక్స్. రాజమౌళి గారు, శంకర్ గారు ఏ విషయంలోనూ కాంప్రమైజ్ అవ్వరు. వారు అనుకున్నది అనుకున్నట్టుగా వచ్చే వరకు షూట్ చేస్తుంటారు. ఇద్దరూ చాలా పర్ఫెక్షన్ కోసం ప్రయత్నిస్తుంటారు. శ్రీకాంత్ గారు, ఎస్ జే సూర్య గారు, సముద్రఖని గారు, అంజలి గారు, కియారా ఇలా ఆర్టిస్టులంతా అద్భుతంగా నటించడంతోనే సినిమాకు ఇంతటి అందం వచ్చింది. అందరి పర్ఫామెన్స్‌లతోనే ఈ సినిమా ఎలివేట్ అవుతోంది. సాయి మాధవ్ బుర్రా గారు మంచి డైలాగ్స్ ఇచ్చారు. తమన్ మంచి మ్యూజిక్ ఇచ్చారు. దిల్ రాజు గారు, శిరీష్ గారు ఈ సినిమాను అద్భుతంగా నిర్మించారు. జనవరి 10న గేమ్ చేంజర్ రాబోతోంది’ అని అన్నారు.
స్టార్ ప్రొడ్యూస‌ర్ దిల్ రాజు మాట్లాడుతూ.. ‘తమిళ్ సినిమాను శంకర్ గారు పాన్ ఇండియాగా చేశారు. రాజమౌళి గారు తెలుగు సినిమాను గ్లోబల్ స్థాయికి తీసుకెళ్లారు. ఆ ఇద్దరి వల్లే ఇప్పుడు ఇలాంటి భారీ చిత్రాలు వస్తున్నాయి. డల్లాస్ ఈవెంట్లో చాలా మాట్లాడాం. ఇంకా నాలుగో తేదీన చాలా మాట్లాడాల్సి ఉంది. శంకర్ గారు ఇప్పటి వరకు చేసినదంతా మెల్లిమెల్లిగా రివీల్ చేస్తూ వస్తున్నాం. ఇప్పుడు ట్రైలర్ను రిలీజ్ చేశాం. ఇప్పటి వరకు మేం చూపింది కేవలం యాభై శాతమే. అసలు మ్యాటర్ ఏంటో జనవరి 10న తెలుస్తుంది. సినిమా అన్ ప్రిడిక్టబుల్‌గా ఉంటుంది. ఇదొక గొప్ప సినిమా కానుంది. ఆర్ఆర్ఆర్ తరువాత గ్లోబల్ స్టార్ రామ్ చరణ్‌తో సినిమా అంటే ఎలా ఉండాలో అలానే ఉంటుంది. పెట్టిన దాని కంటే ఎక్కువ లాభాలు రాబోతోన్నాయి’ అని అన్నారు.
మ్యూజిక్ డైరెక్టర్ ఎస్.తమన్ మాట్లాడుతూ.. ‘మూడేళ్లుగా ఈ సినిమాను దిల్ రాజు గారు చాలా జాగ్రత్తగా దాచారు. దిల్ రాజు గారికి ఈ చిత్రంతో పెద్ద హిట్ రావాలి. జనవరి 10న ఆయనకు నేను ప్రేమగా ఓ హగ్ ఇవ్వాలి. బాయ్స్ నుంచి గేమ్ చేంజర్ వరకు నా ప్రయాణాన్ని శంకర్ గారు చూశారు. ఆయన మొదటి సారిగా ఓ తెలుగు సినిమాను, అది కూడా రామ్ చరణ్ గారితో చేశారు. శంకర్ గారితో నా బంధాన్ని చాటేలా ఈ మ్యూజిక్ ఉంటుంది. మా ట్రైలర్ను లాంచ్ చేసిన రాజమౌళి గారికి థాంక్స్. సంక్రాంతికి పర్ ఫెక్ట్ సినిమాగా గేమ్ చేంజర్ జనవరి 10న రాబోతోంది’ అని అన్నారు.
రైట‌ర్ సాయి మాధవ్ బుర్రా మాట్లాడుతూ..‘గేమ్ చేంజర్ సూపర్ డూపర్ హిట్ మూవీ. అద్భుతమైన సినిమాకు పని చేశానన్న సంతృప్తి ఉంది. శంకర్ గారితో, చరణ్ బాబు పని చేయడం ఆనందంగా ఉంది. రాజమౌళి గారు ట్రైలర్ను రిలీజ్ చేయడం మరింత అద్భుతం. ప్రతీ సీన్ అద్భుతంగా ఉంటుంది. రేపు వచ్చేది సంక్రాంతి కాదు.. శంకరాత్రి’ అని అన్నారు.
యాక్ట‌ర్ శ్రీకాంత్ మాట్లాడుతూ.. ‘నాలుగో తేదీ జరిగే ఈవెంట్లో మాట్లాడేందుకు మాటల్ని దాచి పెట్టుకో అని దిల్ రాజు గారు చెప్పారు. నాకు ఇంత మంచి కారెక్టర్ ఇచ్చిన శంకర్ గారికి థాంక్స్. ఈ పాత్రలో నేను మా నాన్న గారెని చూసుకున్నాను. రామ్ చరణ్ పర్ఫామెన్స్ ఇందులో సెట్స్ మీద, డబ్బింగ్ చెప్పేటప్పుడు చూశాను. గోవిందుడు అందరివాడేలే సినిమా టైంలో కంటే రామ్ చరణ్ ఇప్పుడు ఎంతో స్థాయికి ఎదిగాడు. ఈ మూవీ కోసం మా అమ్మ గారు ఎంతగానో ఎదురుచూస్తున్నారు’ అని అన్నారు.
హీరోయిన్ అంజలి మాట్లాడుతూ.. ‘గేమ్ చేంజర్ నా కెరీర్‌లో చాలా ప్రత్యేకమైంది. ఈ పాత్రలోంచి బయటకు రావడానికి చాలా టైం పట్టింది. ఇంత మంచి పాత్రను ఇచ్చినందుకు శంకర్ గారికి థాంక్స్. ఇలాంటి పాత్రలు అరుదుగా వస్తుంటాయి. రామ్ చరణ్ గారెతో పని చేయడం ఆనందంగా ఉంది. కో ఆర్టిస్ట్‌లకు చాలా కంఫర్ట్ ఇస్తుంటారు. నా నిర్మాతలు దిల్ రాజు, శిరీష్ గారికి థాంక్స్. జనవరి 10న గేమ్ చేంజర్ ఏంటో అందరికీ తెలుస్తుంది’ అని అన్నారు.
యాక్ట‌ర్ ఎస్.జె.సూర్య మాట్లాడుతూ.. ‘మంచి చిత్రంతో ఈ ఏడాది ప్రారంభం అవుతోంది. గేమ్ చేంజర్ లాంటి మంచి సినిమాలో నాకు అవకాశం ఇచ్చిన శంకర్ గారికి థాంక్స్. సినిమా గురించి మనం చెప్పకూడదు.. ఆ సినిమానే మాట్లాడాలని అంటుంటారు. ఈ సినిమా ఏంటో జనవరి 10న అందరికీ తెలుస్తుంది. ఒక్కో సీన్ చేస్తుంటే నేను ఎంతో సంతోషించాను. శంకర్ గారు చాలా బ్రహ్మాండంగా ఈ మూవీని తీశారు. ఆయన రాసిన తీరు, తీసిన తీరు అద్భుతంగా ఉంటుంది. రామ్ చరణ్ ప్రస్తుతం గ్లోబల్ స్థాయికి వెళ్లారు. సెట్‌లో మాత్రం రామ్ చరణ్ ఎంతో హంబుల్‌గా ఉంటారు. ఆయనతో కలిసి పని చేయడం ఆనందంగా ఉంది. సంక్రాంతికి ఈ సినిమాతో అందరూ ఎంజాయ్ చేస్తారు. ట్రైలర్ను రిలీజ్ చేసిన రాజమౌళి గారికి థాంక్స్. మిగిలిన విషయాలు జనవరి 4న జరిగే ఈవెంట్లో మాట్లాడతాను’ అని అన్నారు.
యాక్ట‌ర్ సముద్రఖని మాట్లాడుతూ.. ‘గత ఐదేళ్లు నేను నటించిన ఏదో ఒక మూవీ సంక్రాంతికి వస్తుంది. అలా సంక్రాంతికి వచ్చిన ప్రతీ చిత్రం హిట్ అవుతూనే ఉంది. ఇంత మంచి చిత్రంలో ఇంత అద్భుతమైన పాత్ర ఇచ్చినందుకు థాంక్స్. ఆర్ఆర్ఆర్‌లో చిత్రంలో రామ్ చరణ్ పక్కన బాబాయ్‌ పాత్రలో కనిపించాను. ఇందులో కూడా అలాంటి పాత్రలోనే నటించాను. రామ్ చరణ్ చాలా సిన్సియర్‌గా పని చేస్తారు. సూర్య గారితో పని చేయడం ఆనందంగా ఉంది. ఈ సినిమా పెద్ద హిట్ అవుతుంది’ అని అన్నారు.
