మెగాస్టార్ చిరంజీవి, హిట్ మెషిన్ అనిల్ రవిపూడి కలయికలో రూపొందుతున్న సంక్రాంతి ఎంటర్టైనర్ ‘మన శంకర వర ప్రసాద్ గారు’ ట్రైలర్ తిరుపతిలో విడుదలైంది. విక్టరీ వెంకటేష్ కీలక పాత్రలో నటిస్తున్న ఈ చిత్రం, పూర్తి కుటుంబ వినోదాన్ని అందించనుంది.
జాతీయ భద్రతా సంస్థల్లో పనిచేసిన శంకర వర ప్రసాద్ (చిరంజీవి), ససిరేఖతో ప్రేమలో పడి కుటుంబ మనిషిగా మారతాడు. అయితే, జీవితంలో అనూహ్య సమస్యలు ఎదురైనప్పుడు తన స్టైల్లో ఎలా పరిష్కరిస్తాడనేది కథ. చిరంజీవి హాస్య పాత్రలో మెరిస్తుండగా, వెంకటేష్ మాస్ ఎంట్రీ అదిరిపోయింది. నయనతార సాంప్రదాయ లుక్లో అదరగొడుతుంది. సచిన్ ఖేడేకర్ తదితరులు మిగతా పాత్రలు పోషించారు.
అనిల్ రవిపూడి దర్శకత్వంలో చిరంజీవిని వింటేజ్ స్టైల్లో చూపించడం, హాస్యం-యాక్షన్ మిళితం చేయడం ప్రధాన ఆకర్షణలు. సమీర్ రెడ్డి సినిమాటోగ్రఫీ, భీమ్స్ సెసిరోలియో సంగీతం, ఏఎస్ ప్రకాశ్ ప్రొడక్షన్ డిజైన్ ఉత్తమంగా ఉన్నాయి. షైన్ స్క్రీన్స్, గోల్డ్ బాక్స్ ఎంటర్టైన్మెంట్స్ నిర్మాణంలో రూపొందిన ఈ చిత్రం జనవరి 12న సంక్రాంతి సందర్భంగా విడుదల కానుంది. ట్రైలర్ ఇప్పటికే భారీ హైప్ సృష్టించింది.
