విశ్వక్ సేన్ కథానాయకుడిగా రామ్ నారాయణ దర్శకత్వంలో సాహు గణపతి నిర్మాతగా షైన్ స్క్రీన్స్ నిర్మాణ సంస్థ ద్వారా ప్రేక్షకుల ముందుకు వచ్చిన చిత్రం లైలా. ఫిబ్రవరి 14వ తేదీన ప్రేమికుల రోజు సందర్భంగా ఈ చిత్రం విడుదల కావడం జరిగింది. ఆకాంక్ష శర్మ హీరోయిన్గా వెన్నెల కిషోర్, బ్రహ్మాజీ, అభిమన్యు సింగ్, రవి మారియా, నాగినీడు, హర్షవర్ధన్, బబ్లు పృథ్వీరాజ్, రఘు బాబు, వినీత్ కుమార్ తదితరులు ఈ చిత్రంలో నటించగా లియాన్ జేమ్స్ సంగీతం అందించారు. అయితే ఈ చిత్రం అనుకున్నంత విజయం సాధించకపోవడంతో దీనిపై స్పందిస్తూ హీరో విశ్వక్సేన్ ఒక శ్వేత పత్రం విడుదల చేయడం జరిగింది. ఆ శ్వేత పత్రంలో ఈ విధంగా పేర్కొన్నారు.
నమస్తే,
ఇటీవల నా సినిమాలు అందరూ కోరుకున్న స్థాయికి చేరుకోలేకపోయాయి. నా చివరి సినిమాకు వచ్చిన నిర్మాణాత్మక విమర్శను పూర్తిగా అంగీకరిస్తున్నాను.
నన్ను నమ్మి, నా ప్రయాణాన్ని మద్దతు ఇచ్చిన ప్రతి ఒక్కరికీ – నా అభిమానులకు, నాపై ఆశీర్వాదంగా నిలిచినవారికి హృదయపూర్వక క్షమాపణలు.
నా ప్రాధాన్యం ఎప్పుడూ కొత్తదనం తీసుకురావడమే, కానీ ఆ ప్రయత్నంలో మీ అభిప్రాయాలను నేను గౌరవిస్తున్నాను. ఇక పై, నా ప్రతి సినిమా క్లాస్ లేదా మాస్ అయినా సరే, అసభ్యత ఉండదు.
నేను ఒక చెడు సినిమా తీస్తే, నన్ను విమర్శించే హక్కు పూర్తిగా మీకు ఉంది. ఎందుకంటే, నా ప్రయాణంలో ఎవ్వరూ లేని సమయంలో నన్ను ప్రేమతో ముందుకు నడిపించింది మీరు. నా కెరీర్ ప్రారంభం నుంచి నేను ఎంచుకున్న కథలను మీరు ఎంతగా ప్రేమించారో తెలుసు.
ఇక పై కేవలం సినిమా మాత్రమే కాదు, నా ప్రతి సన్నివేశం కూడా మీ మనసుకు తగిలేలా ఉండాలని నిర్ణయించుకున్నాను. అంతే కాకుండా, నా మీద విశ్వాసం ఉంచిన ప్రొడ్యూసర్స్, డిస్ట్రిబ్యూటర్అందరికీ నా కృతజ్ఞతలు తెలియజేస్తున్నాను.
అలాగే, నా కథానాయకులు దర్శకులు, రచయితలు నా వెన్నెముకగా నిలిచి, నన్ను మలిచిన ప్రతి ఒక్కరికీ నా హృదయపూర్వక ధన్యవాదాలు. మీ అందరి నిర్మాణాత్మక విమర్శలకు ధన్యవాదాలు. త్వరలోనే మరొక బలమైన కథతో ముందుకు వస్తాను. నా మంచి, చెడు కాలాల్లో నన్ను నమ్మి నిలబెట్టుకున్న ప్రతి ఒక్కరికీ కృతజ్ఞతలు.
మీ మద్దతు నాకు ఎంతో ప్రాముఖ్యం.
మీ
విశ్వక్ సేన్
