మలయాళ చిత్ర పరిశ్రమలో విషాద ఛాయలు అలుముకున్నాయి. ప్రముఖ సినిమాటోగ్రఫర్, దర్శకుడు షాజీ కరుణ్ (72) సోమవారం క్యాన్సర్‌తో పోరాడుతూ కన్నుమూశారు. సినిమాటోగ్రఫర్‌గా కెరీర్ ప్రారంభించిన షాజీ, దర్శకుడిగా తనదైన ముద్ర వేశారు. మోహన్‌లాల్ హీరోగా రూపొందిన ‘వానప్రస్థం’ ఆయనకు అంతర్జాతీయ గుర్తింపు తెచ్చిపెట్టగా, ‘పిరవి’ చిత్రంతో జాతీయ అవార్డు అందుకున్నారు. ‘స్వాహం’, ‘నిషాద్’, ‘కుట్టి శృంఖు’, ‘స్వప్నం’ వంటి చిత్రాలతో మలయాళ సినిమాకు కళాత్మక శోభను అందించారు. 2011లో భారత ప్రభుత్వం ఆయన్ను ‘పద్మశ్రీ’తో సత్కరించింది. సినిమాల్లో సహజత్వం, సంగీతం, దృశ్య కావ్యాన్ని అద్భుతంగా ఆవిష్కరించిన షాజీ కరుణ్ మరణం మలయాళ సినిమాకు తీరని లోటు. ఆయన మృతి పట్ల మోహన్‌లాల్, మమ్ముట్టి, సురేష్ గోపి తదితర సినీ ప్రముఖులు తీవ్ర సంతాపం వ్యక్తం చేశారు. అభిమానులు సోషల్ మీడియా వేదికగా నివాళులు అర్పిస్తున్నారు. షాజీ కరుణ్ సినిమా సౌరభం మలయాళ సినీ అభిమానుల హృదయాల్లో చిరస్థాయిగా నిలిచిపోతుంది.
