నందమూరి నటసింహం బాలకృష్ణ కేజీఎఫ్-2 సినిమాలో నటించారా?.. అంటే అవుననే చెబుతోంది గూగుల్. గూగుల్‌లో కేజీఎఫ్ -2 అని సెర్చ్ చేయగానే.. అందులో నటించిన నటులు పేర్లు వస్తున్నాయి. అందులో బాలయ్య ఫొటోతో పాటు పేరు కూడా కనిపిస్తోంది. దీంతో బాలయ్య ఇందులో నటించారా? అనే అనుమానాలు వ్యక్తమవుతున్నాయి. ఇనాయత్ ఖలీల్ పాత్రలో బాలయ్య నటించాడని గూగుల్‌లో చూపిస్తుంది.
కానీ ఆ పాత్రలో బాలీవుడ్ హీరో సంజయ్ దత్ నటించాడు. దానికి బదులు బాలయ్య పేరు చూపించడం ఆశ్చర్యకరంగా మారింది. గూగుల్ తప్పుగా చూపించిందని దీనిని బట్టి అర్థమవుతోంది. ఈ ఏడాదిలో గూగుల్ చేసిన పెద్ద తప్పు ఇదేనని నెటిజన్లు సెటైర్లు వేస్తున్నారు. అప్పుడప్పుడు గూగుల్‌లో ఇలాంటి తప్పులు దొర్లతూ ఉంటాయి. ఇప్పుడు ఇదేమీ కొత్త కాదు.
పాన్ ఇండియాగా తెరకెక్కుతున్న కేజీఎఫ్ 2 సినిమా కోసం ప్రేక్షకులు ఆసక్తిగా ఎదురుచూస్తున్నారు. ఇప్పటికే ఈ సినిమా షూటింగ్ దాదాపుగా పూర్తవ్వగా.. జనవరి 8న ట్రైలర్‌ను విడుదల చేయనున్నారు. వచ్చే సమ్మర్‌లో ఈ సినిమాను విడుదల చేయనున్నారని తెలుస్తోంది.
