సక్సెస్, ఫెయిల్యూర్‌తో సంబంధం లేకుండా వరుస పెట్టి సినిమాలు చేస్తున్నాడు అక్కినేని అఖిల్. ఒక సినిమా విడుదల కాకముందే మరో సినిమాను లైన్లో పెట్టేస్తున్నాడు. ప్రస్తుతం అఖిల్ ‘మోస్ట్ ఎలిజిబుల్ బ్యాచిలర్’ సినిమాలో నటిస్తున్నాడు. బొమ్మరిల్లు భాస్కర్ ఈ సినిమాను తెరకెక్కిస్తుండగా.. అల్లు అరవింద్ సమర్పణలో బన్నీ వాసు దీనిని నిర్మిస్తున్నారు. ఇందులో పూజా హెగ్దే హీరోయిన్‌గా నటిస్తుండగా.. ఈ సినిమా షూటింగ్ దాదాపుగా పూర్తి కావొచ్చింది.
త్వరలో ‘మోస్ట్ ఎలిజిబుల్ బ్యాచిలర్’ సినిమాను విడుదల చేసేందుకు మేకర్స్ ప్రయత్నాలు చేస్తున్నారు. ఇటీవలే విడుదలైన ఈ సినిమా ట్రైలర్ ప్రేక్షకులను విపరీతంగా ఆకట్టుకుంది. ఈ సినిమాపై అఖిల్ భారీగా ఆశలు పెట్టుకున్నాడు. ఇప్పటివరకు అఖిల్ హీరోగా నటించిన ఒక్క సినిమా కూడా హిట్ కాలేదు. దీంతో ఈ సినిమాతోనే అయినా హిట్ కొట్టి సక్సెస్ అందుకోవాలని అఖిల్ చూస్తున్నాడు.
ఇది ఇలా ఉండగానే.. అఖిల్ మరో సినిమాను లైన్లో పెట్టాడు. స్టార్ డైరెక్టర్ సురేందర్‌రెడ్డి డైరెక్షన్‌లో అఖిల్ ఒక సినిమా చేయనున్న విషయం తెలిసిందే. ప్రస్తుతం ఈ సినిమా ప్రీ ప్రొడక్షన్ వర్క్ జరుగుతోంది. జనవరి నుంచి దీని షూటింగ్‌ను ప్రారంభించాలని మేకర్స్ నిర్ణయించారు. ఇందులో హీరోయిన్‌గా అఖిల్ సరసన రష్మిక మందనాను తీసుకోవాలని మేకర్స్ ప్రయత్నాలు చేస్తున్నారు.
