అల్లు అర్జున్ సుకుమార్ కాంబినేషన్ లో తెరకెక్కుతున్న మూడవ సినిమా పుష్ప సినిమా షూటింగ్ త్వరలోనే తిరిగి ప్రారంభం కానుంది. గతంలో ఎప్పుడు లేని విధంగా పాన్ ఇండియా ప్రాజెక్టును చేపట్టిన దర్శకుడు సుకుమార్ షూటింగ్ ని వీలైనంత త్వరగా పూర్తి చేయాలని అనుకుంటున్నాడు. ఇక లాక్ డౌన్ తరువాత తూర్పుగోదావరి జిల్లాలోని మారేడుమిల్లి ఫారెస్ట్‌లో ఒక షెడ్యూల్ కి ఏర్పాట్లు చేస్తున్నారు.
‘పుష్ప’ షూటింగ్ సెప్టెంబర్ మధ్యలోనే మొదలు కావాల్సింది. కానీ వైరస్ కారణంగా మరికొన్ని రోజులు వెయిట్ చేయక తప్పలేదు. ఇక షూటింగ్ త్వరలోనే ప్రారంభం కానుంది. చిత్ర యూనిట్ అడవిలోనే కొన్ని కీలక సన్నివేశాలను చిత్రీకరీంచనుంది. మైత్రీ మూవీ మేకర్స్‌ నిర్మించనున్న ఈ బిగ్ బడ్జెట్ సినిమా రెగ్యులర్ షూటింగ్ డిసెంబర్ 6 నుంచి స్టార్ట్ చేయాలని అనుకుంటున్నారు. ఇప్పటికే మారేడుమిల్లి ఫారెస్ట్‌లో అన్ని ఏర్పాట్లు చేశారు. ఎర్రచందనం అక్రమ రవాణా నేపథ్యంలో తెరకెక్కుతున్న సినిమా కావున అడవుల్లోనే ఎక్కువ భాగం చిత్రీకరిస్తున్నారు. సుకుమార్ గత సినిమాలకంటే ఈ సినిమా పూర్తిగా భిన్నంగా ఉండబోతున్నట్లు తెలుస్తోంది.
