ఆపదలో ఉన్నవారికి అండగా నిలవడం.. ఆర్థికంగా వెనుకబడిన వారికి భరోసా ఇవ్వడం.. ఒంటరిగా మిగిలిన వృద్ధులకు తోడుగా నిలవడం.. సేవను ఒక కార్యక్రమంగా కాకుండా బాధ్యతగా భావిస్తూ ముందుకు సాగుతున్న ‘మనం సైతం’ ఫౌండేషన్ మరో బృహత్తర సేవా కార్యక్రమానికి శ్రీకారం చుట్టింది. ‘సపర్య – వుయ్ కేర్ ఫర్ అన్ కేర్డ్’ పేరుతో నూతన ప్రాజెక్టును ప్రారంభిస్తున్నట్లు ఫౌండేషన్ వ్యవస్థాపకుడు, నటుడు కాదంబరి కిరణ్ ప్రకటించారు.
హైదరాబాద్లోని తెలుగు ఫిలిం ఛాంబర్లో నిర్వహించిన మీడియా సమావేశంలో కాదంబరి కిరణ్ మాట్లాడుతూ.. గత 13 ఏళ్లుగా ‘మనం సైతం’ ద్వారా సమాజంలో ఆపదలో ఉన్నవారికి, అవసరార్థులకు వివిధ రూపాల్లో సహాయాన్ని అందిస్తున్నామని తెలిపారు. సేవా కార్యక్రమాలను మరింత విస్తృతం చేయాలనే ఉద్దేశంతో ‘సపర్య’ ప్రాజెక్టును రూపొందించినట్లు చెప్పారు.
ఆశ్రమంతో పాటు ‘జనతా వైద్యం’
‘సపర్య’ ప్రాజెక్టులో భాగంగా అనాథాశ్రమం, వృద్ధాశ్రమం, పేదలకు అందుబాటులో ఉండే ‘జనతా వైద్యం’ ఆసుపత్రి ఏర్పాటు చేయనున్నట్లు కాదంబరి కిరణ్ తెలిపారు. కేవలం వైద్యం అందించడమే కాకుండా.. రోగులు, వృద్ధులు, అనాథలు మానసిక ప్రశాంతతతో ఉండేలా ఈ ప్రాజెక్టును ప్రత్యేకంగా తీర్చిదిద్దుతున్నామని చెప్పారు.
పెద్ద వాటర్ పాండ్, దాని చుట్టూ వాకింగ్ ట్రాక్, పచ్చని చెట్లతో కూడిన వనం, గాజు తలుపులతో కూడిన గదులు వంటి సౌకర్యాలతో ప్రశాంతమైన వాతావరణాన్ని ఏర్పాటు చేయనున్నట్లు వివరించారు. వైద్యం, వసతి, ఆత్మీయత.. ఈ మూడింటినీ ఒకే చోట అందించాలన్నదే ‘సపర్య’ లక్ష్యమని పేర్కొన్నారు.
ఒంటరి వృద్ధులకు ‘మనం సైతం’ తోడు
నేటి సమాజంలో పిల్లలు విదేశాల్లోనో, ఇతర నగరాల్లోనో స్థిరపడటంతో చాలామంది వృద్ధులు ఒంటరిగా మిగిలిపోతున్నారని కాదంబరి కిరణ్ ఆవేదన వ్యక్తం చేశారు. అలాంటి వృద్ధులను ఆదరించి, వారికి అవసరమైన వసతి, వైద్యం, మానవీయమైన తోడ్పాటును అందించడమే ‘సపర్య’లోని ప్రధాన ఉద్దేశాల్లో ఒకటని తెలిపారు. ‘ఎవరూ లేని వారికి మేమున్నాం’ అనే భరోసాను కల్పించేలా ఈ ప్రాజెక్టును రూపొందిస్తున్నట్లు చెప్పారు.
సినీ కార్మికుల పిల్లలకు విద్యా భరోసా
సేవా కార్యక్రమాలను కేవలం వైద్యం, వసతికే పరిమితం చేయకుండా విద్యారంగంలోనూ విస్తరించనున్నట్లు కాదంబరి కిరణ్ తెలిపారు. ఈ ఏడాది నుంచి ‘క్వాలిటీ థాట్ ఫ్యూచర్ స్కిల్స్ ఫౌండేషన్’ భాగస్వామ్యంతో సినీ పరిశ్రమలో పనిచేస్తున్న కార్మికుల పిల్లలకు ప్రత్యేక విద్యా పథకాన్ని అమలు చేస్తున్నట్లు వెల్లడించారు.
ప్రతి సంవత్సరం ఐదుగురు సినీ కార్మికుల పిల్లలకు ఉచిత హాస్టల్ వసతితో పాటు రెండేళ్ల పాటు నీట్ ప్రవేశ పరీక్షకు ఉచిత శిక్షణ అందించనున్నట్లు తెలిపారు. మరో ఐదుగురు విద్యార్థులకు ఉచిత ఐఐటీ కోచింగ్ అందించేలా ప్రణాళిక రూపొందించినట్లు చెప్పారు.
సినీ పరిశ్రమకు తెర వెనుక సేవలందించే కార్మికుల పిల్లలకు నాణ్యమైన విద్య అందించడం ద్వారా వారి భవిష్యత్తుకు బలమైన పునాది వేయాలన్నదే ఈ కార్యక్రమం ఉద్దేశమని వివరించారు.
‘‘పేదవాళ్లే నా కుటుంబం’’
తన 40 ఏళ్ల సినీ ప్రయాణంలో ఎన్నో ఆటుపోట్లు ఎదుర్కొన్నానని కాదంబరి కిరణ్ గుర్తుచేసుకున్నారు. కష్టాలు ఎదురైనప్పుడు సమాజంపై ద్వేషం పెంచుకోవడం కంటే.. తనకు సాధ్యమైనంత మేరకు సాటి మనిషికి సాయం చేయడంలోనే నిజమైన తృప్తి ఉందనే భావనతో ‘మనం సైతం’ను ప్రారంభించానని చెప్పారు. ‘‘పేదవాళ్లే నా పేరెంట్స్.. పేదవాళ్లే నా కుటుంబం. భగవంతుడు మనల్ని పైకి తీసుకువచ్చినప్పుడు మన రెండో చెయ్యి చాచి వందలాది మంది పేదలను ఆదుకోవాలి’’ అని ఆయన అన్నారు.
‘సర్వీస్ ఈజ్ గాడ్’.. అందరి సహకారం కావాలి
‘సర్వీస్ ఈజ్ గాడ్’ అనే నినాదంతో ‘మనం సైతం’ సేవా కార్యక్రమాలను కొనసాగిస్తోందని కాదంబరి కిరణ్ తెలిపారు. ‘సపర్య’ ఒక వ్యక్తి లేదా ఒక సంస్థ కార్యక్రమం కాకుండా.. సమాజంలోని ప్రతి ఒక్కరూ భాగస్వాములు కావాల్సిన మానవీయ ఉద్యమంగా ఎదగాలని ఆకాంక్షించారు. దాతలు, సినీ ప్రముఖులు, పరిశ్రమ పెద్దలు ‘సపర్య’ ప్రాజెక్టుకు మనస్ఫూర్తిగా మద్దతు, ఆశీస్సులు అందించాలని ఆయన విజ్ఞప్తి చేశారు.
ఆపదలో ఉన్నవారికి ఆసరా.. ఒంటరిగా ఉన్నవారికి ఆత్మీయత.. పేదలకు వైద్యం.. ప్రతిభ ఉన్న పిల్లలకు విద్య.. ఇలా సేవకు పలు కోణాలను జోడిస్తూ ‘మనం సైతం’ చేపడుతున్న ‘సపర్య’ ప్రాజెక్ట్.. సేవా భావానికి మరో విస్తృత రూపంగా నిలవనుంది.
